الفاتورة القاتلة'محمود فرج'

"ممكن فاتورة تقتل؟.. ده بالظبط اللي حصل مع محمود فرج!"

الفنان المصري الراحل "محمود فرج" الشهير بـ "مجانص" واحد من الوشوش الفنية المعروفة للناس بالذات عضلاته القوية، وبنيانه الضخم، واللي بسببهم حصره المخرجين في أدوار معينه بيغلب عليها الطابع الشرير لكنه نجح في اقتحام قلوب المشاهدين بخفة دمه، وتحويل أدواره الشريرة للفكاهة..

"محمود" إتولد سنة 1922 فى أسرة متوسطة وأخد بكالوريوس التربية الرياضية وبعدها بكالوريوس التجارة ودرس برضه خدمة إجتماعية!.. بس وبسبب حبه لمجال الفن درس كمان الفنون المسرحية وقدم كتير من أعمال شكسبير على المسرح!.. 

"محمود" كمان كان بطل فى الملاكمة وده ساعده على دخول عالم السينما وتحديداً فى أدوار الشخص الرياضي زي دوره فى فيلم "أيامنا الحلوة"، "إسماعيل ياسين فى البوليس الحربي" واللي عمل فيه دور "مجانص" ومن وقتها لزق فيه الإسم!.. 

عمل أكتر من 100 فيلم بس الدور الأبرز فى مسيرته بحسب رأى النقاد والجمهور هو دور "عفركوش" فى فيلم "الفانوس السحري" مع "إسماعيل ياسين".. وبرضه من أهم أدواره دوره فى فيلم "فجر الإسلام" اللي قال فيه جملته الأكثر تداولاً حتي لغاية دلوقتي على السوشيال ميديا: (شلت يدي!.. لا لا إنها سليمة).. 

رغم ملامحه وبنيانه وجسمه اللي ممكن يدوا إنطباع عن قسوته أو عنفه لكنه وبشهادة كل اللى تعاملوه معاه كان من أطيب وأجدع الناس اللى ممكن حد يتعامل معاهم!.. 

للأسف وفاة ونهاية "محمود" كانت مأساوية شوية.. أصيب بمرض السكر وفضل فترة طويلة بتعالج منه وبسببه فقد واحدة من رجليه وعينه اليمين!.. إتوفي بسبب حالة نفسية كان بيمر بيها لما لقي نفسه مش قادر يدفع فاتورة الميه الشهرية واللي جت له برقم كبير فصاحب البيت قطع عنه الميه!.. فضل يتألم نفسياً وجسدياً لحد ما توفي سنة 2009 وعمره 87 سنة.. ربنا يرحمه.