مش هانكر... اه حبتها ولسه بحبها وعمري ما حبيت ولا هحب حد غيرها. وبتحين الفرص لمعرفة اخبارها.. وكتير بنزل علي الاماكن اللي جمعتنا مع بعض عشان افتكر واعيش من تاني اجمل لحظات حياتي بكل التفاصيل وبكل الاحاسيس والاقني بضحك او ابكي لوحدي زي المجنون.. وعيون الناس تبصلي ساعات بنظرة صعبنه واحيانا بنظرة ربنا يشفي. حتي بتاع الشاي اللي ضفاف النيل امام مركب Nile City بقي يشفق عليّ. ده ساعات كتيررررر مابيرضاش يحاسبني.. وساعات بيسبلي الكرسي وهو مروح عشان لو قعدتي طولت... وفجأة في يوم قال لي يا بيه انسي اللي راح راح الله يرحمه خليك في حياتك وادعي لها بالرحمه بدل ما انت معذب نفسك ومعذبها. سألته بإستغراب هي مين دي؟! قال ما هو انا اصلي يا باشتنا محسوبك عدي عليه كتير وشعري الابيض بيدل علي خبرة. وبالنباهه كده اكيد اللي راحت منك دي المدام الله رحمها مش كده ولا ايه... سكت لحظات استوعب كلامه... ولاقتني مابردوش عليه... وسرحت ماتت! لا. ياريتها ماتت كان ارحم لي. انا عارف اصلا ايه اللي خلاني اقابلها. منك لله يا اللي كنت السبب...
والله ما عارف ليه وعشان ايه كل الحب اللي انا فيه لها ده سببه ايه.. مع انها اثبت لي مراراً وتكراراً بما لا يدع مجالاً للشك انها ما تستحقهوش. انا.. انا... انا مش فاهم ليه قلبي هيموت عليها كده.. ليه بحلم بيها وبشوفها قدامي كل لحظه... ايه السبب في كل ده؟ الله يلعن ابو الحب اللي بالشكل.. ايه ده؟ انا قمت امتي من مكاني ومشيت ازاي؟ وايه اللي جابني هنا. انا فين؟ ايه ده؟! ده القهوة اللي كنت بقعد معاها فيها! ايه ده انا سامع صوت ضحكتها الله دي هي.. قاعدة هناك اهي فركت عيني ليكون حلم وأتأكدت اني قدام قهوة المعلم قهران. واهي هي هناك ايه ومعاها بنت صغيرة وفي حد مش مجمع ملامحه بيصورها... وهي بتضحك وبتبتسم ولا علي بالها اي حاجه... وانا زي الاهبل غرقان في ذكرياتي وقلبي ابن التيت مقطعني عليها... يا اخي اتلهي بقي وامشي وعيش حياتك الاستاذه اللي انت مقتول عليها اهي قدامك بتضحك وتهرج ومقضيها ومش بعيد تكون في قصه حب تانيه لا ده اكيد.... 😔... واديك شوفتها بعد اما كنت بتتمني تلمح خيالها... اظن كده ارتحت يا قلبي وهديتي يا عواطفي. يلا نروح بقي يلا ننسي بقي. يلا ويارب تكون فهمت يا قلبي وصدقتي يا عيني. بلا حب بلا نيله... سحقاً للنساء عامة وعلي وجه الخصوص سحقاً لك يا من كنتي دنيتي....