انفضها وقوم

قال لي صاحبي وهو يحاورني....  

انت عارف!  انا حاسس اني اوتيل موتيل فندق محطه ترانزيت للبشر.. 

سألته وانا متعجب من التشبيهات دي:  ليه وازاي وايه التشبيهات الغربية  دي 

رد:  اقولك يا سيدي.. بس يا صديقي العزيز... انا اي حد محتاج يفرح او يحزن او حتي محتاج حد يقوله صباح  الخير وكله يبقي من قلبه ... يجي جري شايل همومه او هدومه عشان ينزل عندي في الموتيل او الاوتيل او الترانزيت... وبعد اما تخلص همومه وينشرح صدره للدنيا ويبقي قادر ينزل لمعركه الحياه  مره اخري هوب يشيل هدومه وياخد بعضه وادي وش الضيف.. حتي بعد كده ما بيفكرش يرد علي تليفوناتي وان رد يبقي بالغلط وهو بيشات او يلعب عالفون....  ومحدش بقي مراعي اني انسان زيي زيهم له مشاعر له قلبه عايز حد يفضفض له هو كمان حد يسمعه ويخفف عنه ويضحكه... ايه يا عم ده زي ما اكون مكتوب علي وشي تعالي يامهموم انفضها وقوم... انا تعبت يا اخي ده انا كل ليله بنام دمعتي علي خدي مش لاقي حد يمسحها ولا حد يمنعها. لا اخوات ولا اهل ولا اصحاب. كله بس بيجي لما يكون محتاج ولو لنظره صافيه وابتسامه من القلب. طب انا فين بقي... اكونش ملاك ربنا خالقني اسعد البشر واخد منهم همومهم!  انا تعبت يا صاحبي  بجد تعتب... 

وبعد كده دموعه نزلت من عينه علي خده في صمت وكأنها مية نار.وفجأة خرج من الباب ومشي وسابني..

وقعدت افكر في كلامه كله لاقيته صح ده صاحبي من سنين وقلبه طيب جداااا ويحب الناس كلها يعرفها كان او ميعرفهاش..طيب بشكل انه ممكن ينضحك عليه بنفس الحدوته اكثر من مره.. بيعامل الناس بقلبه وكأنهم زيه ما بيفرقش بين حد واللي يعرف يساعده حتي لو ما قالوش بيجري يساعده... وحطيت نفسي مكانه وعيني دمعت ومقدرتش امسك نفسي من النحيب.. وقمت جريت وراه عشان اكون انا له الموتيل وجريت لما تعبت وفجأة لاقيته مرمي علي الارض صريع بحادثة طريق  والناس ملمومه عليه قلبي اتخلع وقربت منه بسرعة  قربت بس كان فات الاوآن... الله يرحمك يا صاحبي يا اخلص واحن صاحب في الدنيا....