دعوة فرح

أوراق ودفاتر وذكريات في ألبوم صور، وبين كل دول لقيت دعوة فرح، في يوم من كام سنة بس كان يوم من احلي الايام، وفيه ليلة من ليالي الف ليلة وليلة، وافتكرت عزومة الفرح؛ كان أول فرح احضره في حياتي رغم انه ماكنش فرح لحد اعرفه شخصيا: بس هو دعاني وروحت وكان المفروض انه هيعدي عليا ياخدني متعلقة في دراعه وإيدي مشبوكة في إيده، أنا بفستاني وهو ببدلته وكان أول مره أشوفه ببدلة وكرافات، شوفته وطيرت بيه لفوق فوق وكمان حلمت انه ده كان يوم فرحي رغم انه عمره ماقالي انه بيحبني بس كان دايما بيحسسني بيها وبيقربلي مسافات مسافات كان معايا ارق ملاك واول ماشافني نازله من على السلم قالي وهو مستنيني ممكن اقول حاجة كلمة رقيقه قولتلو لاء بدلع قالي بابتسامته الجميلة ايه القمر ده !!! ملاك والله ملاك..

ودقت الطبلة وموسيقي الزفاف، وأخدني بين دراعاته ورقصنا، كنت بتحرك ومش حاسه باللي حوليا ومش شايفه غيره وقريتها في عينه بحبك تتجوزيني؛ وبكره هنكون زي دول، بدل ماتكوني بفستان اسمر في بتنجاني وأنا ببدله عادية تبقي بفستانك الأبيض وانا ببدله فرحنا قرتها في عيونه وحسسني بيها ضمني بعيونه وبدراعاته قالي ساعتها احلي كلام واخدني لدنيا بعيده نسيت الدنيا والفرح والناس بنيت احلام جوايا اتاريه هو كمان كان مشاركني فيها، عمري ماكنت اتخيلت فلحظه انها هتكون ذكري..

وخلصت الرقصة واحنا زي مااحنا زي الموج بيرقص ع الشط مع كل كلمه رقيقة وكل نغمة ارق وانا بين ايديه خطوة بخطوة واخدنا الشوق لبعيد بعيد عن كل المعازيم ونزلت دمعة مني تقوله عايزه اعرف قولي ..ايه احساسك عايزة اعرف هل بتحب ولا ده كدب؛ مسحها بايده وباسها بشفايفه وحلفلي بيها انه بيحبني اوي وقالي ساعتها بحبك اوي …….بحبك تتجوزيني؛؛؛ وانا زي الموج بميل شمال ويمين، واخدني من ايدي والمرة دي حقيقي بعيد عن كل الناس حولينا وحكالي عن احساسه وقالي…

انا حاسس جدا بيكي، حاسس مش هكون غير ليكي .. ايه ؟! ماردتيش ليه عليا بتحبيني ؟!

رديت عليه وقتها وقولت انت حاسس واكتر حد بيا شاعر ومن قبل مااتكلم ترد تقولي بفكر في ايه قبل مابتنزل دموعي بتمسحها قبل الأمي وأوجاعي لأزم ترسم بسمة علي شفايفي يبقي أزاي اكون مابحبكش أيوه بحبك.

واخدتنا الدنيا لدنيا بعيدة لما سمعنا غنوة رقيقة رقصت عليها قلوبنا وخلاني في الليلة دي انا العروسه .. وخلص الفرح واخدني علي بيتي وصلني وقالي هنتكلم بالليل وصلني و طلعت بوست كل اللي في البيت شافوني متغيرة قالولي احلويتي فيكي شيئ غريب عيونك بتلمع في ضي جميل رديت وهما في حضني وحشتوني وحشتووووني ودخلت اوضتي وقفلت الباب لقيت تليفوني بيرن وقالي اول مارديت ..لا لا دانا مالحقتش ارد دي كانت همسة حب لقيته بحبك وحشتيني وحبك كل عمري قولتي ايه رديت وقولت وانت كل روحي وقلبي يبقي كده بنكمل بعض وعيشت معاه ساعات وساعات نتكلم عن كل اللي فات قولت وقالي احلي كلام وقالي انا غيور اوي.

ولما جت سيرة الفراق …قالي لاء لاني بخاف بخاف الفراق واخدنا الكلام لحد ماخلاني انا العروسة قالي انه حلم بيا مراتة وام لاولاده ليالي طويلة ضحك وكانت اول مره اسمع فيها صوت ضحكاته واخدني في حضنه بس باحساسي اعمل ايه اصله عرف ازاي فيه يحببني.

وحكالي ..حكالي عن احلامه بيا وانا ساكته بس سامعه اتمنيت انه يكون جنبي ومعايا يعيشني حلمه حقيقة معاه اقاسمه فيه المسه واحسه بايدي واحساسي.

وحلفلي بدمعة عيني اللي كان اول مره يشوفها الليلة حلفلي انه اصعب عذاب وانه عمره ما هيحسسهولي ومرت ايام وايام …

بس ده دوام الحال من المحال من غير اي عتاب بعد عني وهو اللي اختار يبعد رغم حبه ليا ورغم احساسه وشوقه ليا كحبيبة وزوجة قالي في يوم انه لازم لازم يكون بنا الفراق ورضيت لاني حلفتله في يوم اني هكون دايما ليه اسمع الكلام ومارفضش ابدا اي كلام

وبقينا اصحاب لحد مابقي يشوفني ولا كاني قدامه وجعني المني بس كفايه اني ماوجعتوش وطفي لمعه عيوني ولما بقي يشوفونا الناس يقولو بعد مااصعب عليهم هما دول اللي كانو عشاق …اه ياعيني علينا هو ده الحب اللي حلفلي عليه في يوم وليلة يبيع كل ده في لحظه واحده ويبقي بنا مجرد ذكريات؛ لقاء جاف ووداع من غير وعود بس بسال …..بقي هو ده اللي كان بيخاف من فراقي جنبك خليني في حضنك اعيش والحلم اللي حلمناه امبارح عدي وراح وبقيت وحدي وفاتت سنين ودعوة الفرح بين اوراقي وكتبي زي مايكون محتفظة بيها عشان افتكر ايام كانت جميلة بتقولي وتحكيلي عن حلم بعيد عيشته في يوم وليلة مع اربع حروف في كلمة اتقالت اما هو فراح وراحت ايامه وفين اراضيه او عنوانه ده راح وماسبش حتي عنوان بس سابلي ذكري والف ذكري عليها دمعه لاني دايما بفتكرها وافتكره اضحك وابكي ماهي دي عادتي معاه ابكي واضحك بس هو فين يمسح دمعي.

راح ايوه راح ونسي نسي انه كله سلف ودين بس حرام انا نفسي اشوفه واحكيله عن ايام وحلم ضاع وضاعت كل الاماني وعن غربة عايشة فيها وحدي ايوه وحدي من غيره علي ذكري وجعاني يمكن يوم نرجع تاني بس اكيد اليوم ده بعيد لانك زي ماقربت بعدت وكان البعد ده مايخترش علي بالي ابدا يبقي ازاي هنتلاقي تاني …

اه والله كانت حلوه الايام حلوه اوي اوي ..

ياسلام شوف احنا فين الوقتي وازي قدرت علينا الايام ..

تعرفو انا نفسي نعود طب والله انا نفسي اشوفه وبسال هي ملامحه شكلها ايه وياترا هيعرفني ولا ملامحي جه عليها الزمان وبقيت طير مش قادر ع الطيران بعد ماكسرني بفراقه .

واهي بقت ذكريات وكله من دعوه الفرح اللي بين الدفاتر والصور ….